Victoria Beckham tók þátt í tískuvikunni í New York á dögunum, þar sem hún sýndi nýju vor- og sumarlínuna sína.
Sýningin var ákaflega umtöluð, en Beckham hefur verið harðlega gagnrýnd fyrir að ráða örmjóar fyrirsætur til að sýna fatnað sinn.
Sarah Vine, greinarhöfundur Daily Mail, skýtur föstum skotum á Beckham og segir að fyrirsætur hennar hafi verið skinhoraðar, auk þess sem fatnaðurinn virðist einnig hafa verið hannaður með það í huga að sýna hversu grannar fyrirsæturnar eru.
„Mittismál táningsstúlknanna á sýningunni, svo sem hinna 180 cm löngu Jessie Bloemendaal og Camille Hurel, er í kringum 60 cm sem er álíka mikið og hjá átta ára stúlkubarni.“
„Flestir kjólarnir voru hannaðir með það í huga að draga athygli að rifbeinum, magasvæðinu eða örmjóum handleggjum fyrirsætanna,“ segir Vine í pistli sínum sem birtist á Daily Mail. Þá vill hún einnig meina að förðun fyrirsætanna hafi vísvitandi verið hagað þannig að þær litu út fyrir að vera óheilbrigðar, óhamingjusamar og sveltar.
„Hárlos og dökkir baugar eru ein fyrstu merki lystarstols, en mér virtist sem förðunin hafi vísvitandi líkt eftir þessu ástandi.“