Grindavík tekur á móti Eyjamönnum í Pepsi-deild karla í knattspyrnu í dag klukkan 18. Þetta er frestaður leikur frá 17. umferð en honum var frestað vegna svínaflensufaraldurs sem gerði vart við sig í herbúðum Suðurnesjaliðsins.
Sigurliðið í rimmunni í kvöld gulltryggir veru sína í deildinni en Grindavík og ÍBV eru jöfn að stigum með 21 stig, eru sjö stigum á undan Fjölnismönnum sem eru í næstneðsta sæti deildarinnar en Grafarvogsliðið á þrjá leiki eftir.
Eftir góðan sigur á FH-ingum í Kaplakrika hafa Grindvíkingar tapað tveimur leikjum í röð, gegn Fram og Fylki, en Eyjamenn, sem hafa misst Englendingana Ajay Leight-Smith og Chris Clements úr sínum röðum, hafa verið á góðri siglingu og hafa aðeins tapað einum af síðustu átta leikjum sínum.
gummih@mbl.is