Ólafur Þórðarson, þjálfari Víkinga, var ósáttur svo vægt sé til orða tekið við frammistöðu dómarans Gunnars Jarls Jónssonar eftir að Víkingar féllu úr leik gegn Val í átta liða úrslitum bikarsins í kvöld, 2:1.
Víkingar komust yfir í fyrri hálfleik en fengu á sig jöfnunarmark strax í þeim síðari þegar Thomas Nielsen, markvörður þeirra, virtist slá boltann í eigið net eftir hornspyrnu. Ólafur var allt annað en sáttur að ekki væri dæmt brot á sóknarmenn Vals.
„Þetta var augljóst brot, það var haldið í aðra höndina á honum enda sjá þeir það sem horfðu á leikinn að hann er að reyna að ná boltanum en Valsararnir hanga á honum. Og dómarinn sér ekki neitt! Þetta er alveg ótrúlegt,“ sagði Ólafur í samtali við mbl.is og hækkaði róminn máli sínu til stuðnings en var ekki hættur.
„Það er erfitt að spila á móti svona mörgum leikmönnum og vera með dómarann meira í hina áttina líka, það er bara þannig. Það hallaði verulega á okkur í leiknum,“ sagði Ólafur ákveðinn.
Leikurinn jafnaðist nokkuð eftir markið en tíu mínútum fyrir leikslok tryggði Ian Williamson sigur Valsmanna og var Ólafur ekki ánægður með sína drengi í aðdraganda marksins.
„Eftir að þeir jafna reyndum við að sækja annað mark, enda er ekki spilað til eilífðar í bikarnum. Við fengum hins vegar á okkur annað mark sem var algjör aulaskapur. Við gáfum þeim þetta mark, það er ósköp einfalt mál,“ sagði Ólafur Þórðarson, þjálfari Víkinga, í samtali við mbl.is eftir leikinn.