Jason kominn heim og líður vel – sjúkrabíll 11 mínútur á leiðinni
Setja bókamerki
Sigurður Hlíðar Rúnarsson, deildarstjóri knattspyrnudeildar Breiðabliks, segir líðan Jasons Daða Svanþórssonar góða eftir að hann lagðist niður og hélt um brjóstkassa sinn í leik Breiðabliks og FH í gærkvöldi og var í kjölfarið fluttur á sjúkrahús.
„Hann er allavega kominn heim og líður vel. Allar rannsóknir sem hann hefur farið í hafa komið vel út,“ sagði Sigurður Hlíðar í samtali við mbl.is, en Jason Daði fékk að fara af sjúkrahúsinu í gærkvöldi.
Þrátt fyrir að allt hafi komið vel út úr rannsóknunum sem Jason Daði gekkst undir í gærkvöldi er ekki enn vitað nákvæmlega hvað gerðist, líkt og hann sagði sjálfur við Fótbolta.net í morgun.
„Ég er ágætur, það er ekki komið í ljós hvað gerðist. Ég fer í fleiri rannsóknir í vikunni. Ég fékk að fara heim í gærkvöldi,“ sagði Jason Daði við Fótbolta.net.
„Ég átti bara erfitt með andardrátt og var illt í hausnum. Sjúkraþjálfarinn kom til mín, hjálpaði mér í gegnum þetta og það er allt í góðu núna.
Ég fór í myndatöku og það er allt í góðu með hjartað. Ég fékk hausverk og svima en get rosa lítið sagt hvað gerðist,“ sagði Jason Daði svo í samtali við Vísi í morgun.
Ósanngjörn umræða
Í samtali sínu við mbl.is var Sigurður Hlíðar spurður um hversu langan tíma það hefði tekið sjúkrabíl að koma á Kópavogsvöll til þess að flytja Jason Daða á sjúkrahús.
„Ég hef verið að sjá, að mér finnst, ansi ósanngjarna umræðu um það gagnvart þeim [sjúkraflutningamönnunum]. Við vorum að fara yfir þetta og þetta voru um 11 mínútur sem það tók þá að koma.
Maður er búinn að sjá 40-45 mínútur nefndar. Auðvitað líður þetta alltaf eins og heil eilífð en þetta voru nú ekki nema 11 mínútur,“ sagði hann.
Á vellinum í gær var kallað eftir lækni úr stúkunni vegna atviksins. Hér á landi er það hins vegar ekki í neinum reglugerðum að félög geri ráðstafanir um að læknir sé til taks á vellinum.
„Það er ekki í reglugerðum hér á landi. Það er í Evrópukeppnum en ekki í efstu deild eða öðrum deildum hérna heima,“ útskýrði Sigurður Hlíðar.
Það sama er að segja af sjúkrabílum. Þeir verða að vera við völlinn í Evrópukeppnum en engin krafa er gerð um það í deildakeppni hér á landi.
Móðirin sögð hafa játað að verða syni sínum að bana
„Byggja varnargarð utan um fólkið okkar“
Ráðherrar taki „lúku úr ríkiskassanum“
Halla svarar fyrir útgjöldin hjá Orkustofnun
Stjórnvöld hafa tvo mánuði til að bregðast við
Enginn tími til að hemla
„Fólk þolir óvissu í ákveðinn tíma“
