Aron Sigurðarson úr KR og Damir Muminovic úr Breiðabliki náðu stórum áföngum á knattspyrnuferlinum í sjöundu umferð Bestu deildar karla sem lauk í kvöld og nýtt land bættist á listann yfir erlenda leikmenn sem hafa skorað í efstu deild karla.
Aron lék sinn 300. deildaleik á ferlinum þegar KR-ingar lögðu FH að velli í Kaplakrika, 2:1, og skoraði jafnframt sitt fyrsta mark í deildinni fyrir Vesturbæjarliði. Aron lék 95 leiki fyrir Fjölni á árunum 2010-2015, þar af 40 í úrvalsdeild og 55 í 1. deild. Hann lék síðan 102 deildaleiki í Noregi með Tromsö og Start, 23 leiki í Belgíu með Royale Union og svo 77 leiki í Danmörku með Horsens. Leikurinn gegn FH var síðan þriðji leikur Arons með KR í deildinni.
Deildamörkin hans á ferlinum eru 76, þar af 20 fyrir Fjölni, 6 fyrir Tromsö, 27 fyrir Start, 7 fyrir Royale Union, 15 fyrir Horsens og nú eitt fyrir KR.
Damir lék sinn 250. leik í efstu deild í kvöld þegar Breiðablik sigraði Stjörnuna á Kópavogsvelli, 2:1. Leikir hans í fjórum efstu deildunum eru orðnir 320 talsins.
Damir er 24. leikmaðurinn í sögu efstu deildar sem nær 250 leikjum. Hann lék fyrst 16 leiki fyrir HK, þá 22 fyrir Víking í Ólafsvík og hefur nú spilað 212 leiki fyrir Breiðablik í deildinni en hann er næstleikjahæstur í sögu félagsins á eftir Andra Rafni Yeoman sem hefur spilað 279 leiki.
Silas Songani varð fyrsti knattspyrnumaðurinn frá Simbabve til að skora mark í efstu deild á Íslandi þegar hann jafnaði fyrir Vestra gegn Víkingi í gær. Eini landi hans sem hefur áður spilað í deildinni er Kundai Benyu sem lék með ÍBV árið 2022 en hann lék einmitt áður með Vestra í 1. deild.
Fylkismennirnir Matthias Præst frá Danmörku og Aron Snær Guðbjörnsson skoruðu einnig báðir sitt fyrsta mark í deildinni þegar Árbæingarnir töpuðu 4:2 fyrir KA á Akureyri. Matthias í sínum sjöunda leik og Aron í sínum þriðja leik.
Arnþór Ari Atlason úr HK og Guðmundur Magnússon úr Fram skoruðu báðir í sínum þriðja leik í röð í sjöundu umferðinni. Arnþór bætti markamet sitt fyrir HK en þetta var hans 17. mark fyrir félagið í efstu deild.
Ívar Breki Helgason úr Vestra, Eiður Gauti Sæbjörnsson úr HK og Bjarni Guðjón Brynjólfsson úr FH léku sinn fyrsta leik í efstu deild í umferðinni.
Úrslitin í 7. umferð:
Vestri - Víkingur R. 1:4
KA - Fylkir 4:2
FH - KR 1:2
Breiðablik - Stjarnan 2:1
Fram - ÍA 1:1
HK - Valur 1:2
Markahæstir í deildinni:
7 Viktor Jónsson, ÍA
5 Danijel Dejan Djuric, Víkingi R.
5 Patrick Pedersen, Val
4 Atli Sigurjónsson, KR
3 Ari Sigurpálsson, Víkingi R.
3 Arnþór Ari Atlason, HK
3 Aron Elís Þrándarson, Víkingi R.
3 Atli Þór Jónasson, HK
3 Ásgeir Sigurgeirsson, KA
3 Guðmundur Magnússon, Fram
3 Gylfi Þór Sigurðsson, Val
3 Jason Daði Svanþórsson, Breiðabliki
3 Sigurður Bjartur Hallsson, FH
Næstu leikir:
25.5. KR - Vestri
25.5. ÍA - Víkingur R.
25.5. Valur - FH
26.5. Fram - Breiðablik
26.5. Stjarnan - KA
27.5. Fylkir - HK
30.5. Valur - Stjarnan
30.5. Breiðablik - Víkingur R.