Shevchenko langar til Bandaríkjanna

Andriy Shevchenko, úkraínski knattspyrnumaðurinn sem leikur með Chelsea, kveðst hafa mikinn áhuga á að leika í Bandaríkjunum áður en ferlinum lýkur. Hann segist þó alls ekki á förum frá ensku bikarmeisturunum þrátt fyrir köflótt gengi sitt í vetur og talsverðrar gagnrýni eftir að hafa verið keyptur til félagsins fyrir 30 milljónir punda.

„Knattspyrnan er á uppleið í Bandaríkjunum og það væri gaman að taka þátt í því. Ég spilaði gegn úrvalsliði deildarinnar þar í fyrra og sá að framfarirnar eru augljósar," sagði Shevchenko við vefsíðu tímaritsins Sports Illustrated.

Hann kvaðst ekki hafa átt sitt versta tímabil á ferlinum nú í vetur. „Það er alltaf búist við miklu af mér en ég var ekki frískur fyrstu fjóra mánuðina, annars vegar var ég þreyttur eftir HM og hinsvegar var ég í basli með meiðsli. En ég náði góðum kafla á miðju tímabili og þrátt fyrir allt skoraði ég 14 mörk og lagði upp 11 eða 12 til viðbótar, og það er ekki slæmt," sagði Shevchenko.

• 1 blogg um fréttina

Bloggað um fréttina

• Gísli Foster Hjartarson: Mig langar líka til USA