Eggert reyndi að fá Djibril Cissé til West Ham

Ranko Stojic, umboðsmaður franska knattspyrnumannsins Djibril Cissé, sagði við BBC í dag að Eggert Magnússon hefði sýnt áhuga á að fá Cissé til West Ham. Cissé , sem er samningsbundinn Liverpool, gengur hinsvegar að öllum líkindum til liðs við Marseille þar sem hann var í láni á síðasta tímabili.

„Ég býst við því að gengið verði frá samningum í dag eða á morgun. Ég hef átt mjög annríkt í vikunni, þurft að fljúga sex flugferðir síðustu tvo sólarhringana, og því miður hef ég ekki getað hringt til baka í alla sem höfðu samband við mig, m.a. Eggert Magnússon hjá West Ham," sagði Stojic við BBC.

Cissé, sem er 25 ára, hefur verið í röðum Liverpool í þrjú ár en missti mikið úr vegna alvarlegara meiðsla. Hann skoraði 8 mörk í 21 leik fyrir Marseille í vetur og hann hefur gert 9 mörk í 33 landsleikjum fyrir Frakkland.

• 2 blogg um fréttina

Bloggað um fréttina

• Pétur Björn Jónsson: Ekki fréttir
• Gunnar Björnsson: Hvað, er Eggert alls staðar?