Arsenal varð að sætta sig við markalaust jafntefli á heimavelli gegn West Ham í ensku úrvalsdeildinni í knattspyrnu í dag og vonir Arsenal um að blanda sér í titilbaráttuna minnka með hverjum deginum.
Arsenal var sterkari aðilinn en tókst ekki að brjóta á bak aftur varnarmúr West Ham en Íslendingaliðið lék af mikilli skynsemi og hefur ekki tapað síðustu sex leikjum sínum í deildinni.
Aston Villa og Wigan gerðu einnig markalaust jafntefli og er Villa komið upp að hlið Chelsea og Liverpool með 48 stig en Manchester United er í toppsætinu með 50.
Hermann Hreiðarsson lék allan tímann með Portsmouth sem steinlá fyrir Fulham á Craven Cottage. Norðamaðurinn Erik Nevland skoraði tvö mörk og Andy Johnson eitt fyrir Fulham en David Nugent náði að laga stöðuna fyrir gestina.
Mikið fjör var á Reebok vellinum í Bolton þar sem Bolton sigraði Tottenham, 3:2. Grétar Rafn Steinsson lék allan tímann fyrir Bolton sem komst í 2:0 með mörkum frá Sebastien Puygrenier og Kevin Davies. Darren Bent sem kom inná fyrir Tottenham í hálfleik jafnaði með tveimur mörkum með stuttu millibili en Davies tryggði heimamönnum sigurinn undir lokin.
Nýliðaslag Hull og WBA lyktaði með 2:2 jafntefli. Bernard Mendy og Craig Fagan gerðu mörk Hull en Jay Simpson og Chris Brunt fyrir WBA.
Þá gerðu Middlesbrough og Blackburn markalaust jafntefli á Riverside og Boro hefur nú leikið 12 leiki án sigurs.