Ferguson: Everton gaf bara fram á Fellaini

Sir Alex Ferguson, knattspyrnustjóri Manchester United, var ekki kátur eftir tapleikinn gegn Everton, 1:0, í gærkvöldi en United hafði fyrir leikinn ekki tapað í fyrstu umferð síðan 2004.

Belginn stóri og stæðilegi, Marouane Fellaini, fór hamförum í leiknum og skoraði sigurmarkið með skalla eftir hornspyrnu. Hann lék varnarmenn Man. United grátt allan leikinn en vegna meiðsla léku Antonio Valenica og Michael Carrick í vörn United.

„Hann [Fellaini] er erfiður. Hann er stór og sterkur strákur og Everton gaf bara alltaf fram á hann. Það var eina sem liðið gerði. Everton vann út frá því að koma boltanum á hann og fékk markið frá honum,“ sagði Ferguson eftir leikinn í gær.

„Miðvarðarstaðan er vandamál hjá okkur en við réðum nokkuð vel við það. Mér finnst ekki hægt að gagnrýna vörnina. Carrick stóð sig ágætlega,“ sagði sir Alex Ferguson.

• 1 blogg um fréttina

Bloggað um fréttina

• Haraldur Haraldsson: Ferguson: Everton gaf bara fram á Fellain///Engar afsakannir Ferguson!!!