Hollenski landsliðsmaðurinn Georginio Wijnaldum sem lék með Newcastle United í ensku úrvalsdeildinni í knattspyrnu karla á síðustu leiktíð er þessa stundina í læknisskoðun á Melwood, æfingasvæði Liverpool. Það er Skysports sem greinir frá þessu.
Eins og greint var frá á mbl.is í morgun hafa Liverpool og Newcastle United komist að samkomulagi um kaupverð á þessum hollenska sóknartengiliði, en kaupverðið er talið vera í kringum 25 milljónir punda.
Wijnaldum skoraði 11 mörk í 38 leikjum fyrir Newcastle í úrvalsdeildinni í fyrra, en hann hefur leikið 30 landsleiki fyrir Holland og skorað í þeim leikjum sex mörk. Wijnaldum skoraði þar áður 64 mörk í 220 leikjum fyrir PSV Eindhoven og Feyenoord í hollensku úrvalsdeildinni.