Austurríkismaðurinn Ralph Hasenhüttl, sem þjálfari RB Leipzig, toppliðið óvænta í þýsku knattspyrnunni, staðfesti í dag að Arsenal hefði sýnt því áhuga að hann yrði eftirmaður Arsene Wengers sem knattspyrnustjóri hjá Lundúnafélaginu.
Fyrr í vikunni var Hasenhüttl orðaður við starfið í götublaðinu The Sun og hann var spurður út í þetta á fréttamannfundi í dag.
„Þetta var vel unnin frétt og það var mikið til í henni. Ég hef heyrt margt verra en að taka við af þeim stjóra sem lengst hefur starfað á Englandi. Þetta skemmir ekkert fyrir mér, held ég. En við þurfum ekki að hugleiða þetta of mikið, hérna datt ég í lukkupottinn," sagði Hassenhüttl ennfremur.
Hann tók við liði RB Leipzig í sumar, eftir að það vann sér sæti í efstu deild í fyrsta skipti, og þar trónir það nú taplaust á toppnum, þremur stigum á undan Bayern München, og býr sig undir heimaleik gegn Schalke á morgun.
Hasenhüttl er 49 ára gamall og lék í Austurríki, Þýskalandi og Belgíu, m.a. með Köln og varaliði Bayern München, og hefur þjálfað í Þýskalandi frá 2007. Hann var síðast með lið Ingolstadt og fór með það upp í efstu deild í fyrsta skipti og hélt því þar á síðasta tímabili.