Íþróttir | Enski boltinn | mbl | 13.10.2017 | 9:43

Klopp á að fá jafn langan tíma og Ferguson

Jürgen Klopp, knattspyrnustjóri Liverpool. AFP

Kenny Dalglish, fyrrum leikmaður og knattspyrnustjóri hjá Liverpool, telur að Jürgen Klopp, knattspyrnustjóri Liverpool, eigi að fá jafn mikla þolinmæði og Sir Alex Ferguson var gefin á upphafsárum sínum sem knattspyrnustjóri Manchester United.

Þrátt fyrir að Liverpool sé sjö stigum á eftir Manchester United sem trónir á toppi deildarinnar ásamt Manchester City þegar sjö umferðir eru búnir af ensku úrvalsdeildinni er Daglish á þeirri skoðun að Klopp sé rétti maðurinn fyrir Liverpool.

„Klopp er fullkominn fyrir Liverpool að mínu mati. Liverpool hefur spilað nógu vel til þess að hafa betur í öllum þeim leikjum sem að ég hef séð á yfirstandandi leiktíð. Ef leikmenn hafa trú á sjálfum sér geta þeir borið sigur úr býtum gegn Manchestrer United á morgun,"sagði Dalglish í samtali við Liverpool Echo.

„Þolinmæði er dyggð í fótbolta. Lítið til dæmis á tíma Ferguson hjá Manchester United. Það gekk ekki vel í upphafi þar, en forráðamenn félagsins gáfu honum tíma og það skilaði sér svo sannarlega. Samfélagið hefur þróast í þá átt að fólk getur fengið svar við öllu á skömmum tíma. Það hefur leitt af sér mikla óþolinmæði sem að ég tel vera til trafala í fótboltaheiminum,“ sagði Daglish enn fremur.