Íþróttir | Formúla 1 | mbl | 26.4.2008 | 13:05 | Uppfært 13:50

Räikkönen marði Alonso á síðustu sekúndunum

Alonso og Briatore höfðu ástæðu til að fagna úrslitum tímatökunnar í Barcelona. ap

Kimi Räikkönen hjá Ferrari var í þessu að vinna ráspól spænska kappakstursins í Barcelona eftir mjög tvísýna keppni. Við gríðarlegan fögnuð heimamanna var Fernando Alonso á Renault um tíma í efsta sæti í lokalotunni er aðeins Räikkönen átti sínum hring ólokið.

Alonso segir að það lyfti sér venjulega að keppa á heimavelli vegna mikils stuðnings úr áhorfendastúkunum. Á því var engin breyting nú og var hann ákaft hvattur til dáða og eins og áhorfendur nær allir væru í Renaultbláum skyrtum.

Er þetta langbesta frammistaða Alonso í tímatökum á árinu og virðist Renaultinn hafa haft gott af þeim endurbótum sem á honum hafa verið gerðar frá síðasta móti. Athyglisvert er að Räikkönen var aðeins tæpri tíund úr sekúndu fljótari í förum.

Felipe Massa á Ferrari varð þriðji en hann vann ráspólinn og setti svo hraðasta hring á leið til sigurs í kappakstrinum í fyrra. Robert Kubica á BMW varð fjórði, sjö þúsundustu úr sekúndu á eftir Massa, en eftir fyrri tímahringinn í lokalotunni var hann í efsta sæti.

Massa var um stund í efsta sæti en í byrjun seinni tímahringja tók Lewis Hamilton á McLaren forystu.

Það dugði þó ekki lengi og varð hann á endanum fimmti, sæti á undan liðsfélaga sínum Heikki Kovalainen.

Annars var þetta eiginlega dagur Renault því auk langbesta árangurs Alonso í tímatökum á árinu komst Nelson Piquet í fyrsta sinn í þriðju umferð. Hefur hann keppni á morgun í tíunda sæti.

Honda missti naumlega af því að eiga mann meðal 10 bestu, Rubens Barrichello vantaði aðeins 65 þúsundustu úr sekúndu á að komast í lokalotuna. Félagi hans Jenson Button varð þrettándi.

Sebastien Bourdais á Toro Rosso komst í aðra umferð annað mótið í röð og sló liðsfélaga sínum Sebastian Vettel aftur við. Bílar Máttar Indlands urðu báðir meðal 10 fremstu á æfingu í gær. Annað var uppi á teningnum í dag því Giancarlo Fisichella og Adrian Sutil urðu í aðeins 19. og 20. sæti í tímatökunum.

Niðurstaða tímatökunnar varð sem hér segir og þar með rásröðin á morgun:

Röð	Ökuþór	Bíll	Lota 1	Lota 2	Lota 3	Hri.
1.	Räikkönen	Ferrari	1:20.701	1:20.784	1:21.813	17
2.	Alonso	Renault	1:21.347	1:20.804	1:21.904	18
3.	Massa	Ferrari	1:21.528	1:20.584	1:22.058	16
4.	Kubica	BMW	1:21.423	1:20.597	1:22.065	13
5.	Hamilton	McLaren	1:21.366	1:20.825	1:22.096	14
6.	Kovalainen	McLaren	1:21.430	1:20.817	1:22.231	15
7.	Webber	Red Bull	1:21.494	1:20.984	1:22.429	19
8.	Trulli	Toyota	1:21.158	1:20.907	1:22.529	19
9.	Heidfeld	BMW	1:21.466	1:20.815	1:22.542	20
10.	Piquet	Renault	1:21.409	1:20.894	1:22.699	18
11.	Barrichello	Honda	1:21.548	1:21.049		12
12.	Nakajima	Williams	1:21.690	1:21.117		15
13.	Button	Honda	1:21.757	1:21.211		12
14.	Glock	Toyota	1:21.427	1:21.230		16
15.	Rosberg	Williams	1:21.472	1:21.349		15
16.	Bourdais	Toro Rosso	1:21.540	1:21.724		15
17.	Coulthard	Red Bull	1:21.810			6
18.	Vettel	Toro Rosso	1:22.108			10
19.	Fisichella	Force India	1:22.516			11
20.	Sutil	Force India	1:23.224			8
21.	Davidson	Super Aguri	1:23.318			9
22.	Sato	Super Aguri	1:23.496			9