Heikki Kovalainen hjá McLaren var í þessu að vinna ráspól breska kappakstursins í Silverstone. Er það jafnframt fyrsti ráspóll hans frá því hann hóf keppni í formúlu-1. Mark Webber á Red Bull var um skeið með besta tíma en hefur keppni í öðru sæti.

Landi Kovalainen, Kimi Räikkönen á Ferrari, varð þriðji og fær sér við hlið á rásmarkinu heimamanninn Lewis Hamilton hjá McLaren.

Svo skemmtilega vill til að Kovalainen vann einnig í Silverstone sinn fyrsta ráspól í keppni á opnum bílum. Það gerðist í formúlu Renault fyrir sjö árum. Eru það öllu veigaminni bílar en í formúlu-1.

Eftir fyrri tímatilraun ökuþóranna í lokalotunni sat Kovalainen í efsta sæti. Liðsfélagi hans Hamilton stefndi í betri tíma en ofkeyrði bílinn í Priorybeygjunni undir lokin; flaug út úr brautinni í og henti frá sér hugsanlegum ráspól.

Þennan tíma Kovalainen bættu svo Webber, Räikkönen og Hamilton í seinni tilrauninni en Finninn knái átti svar. Var engin heppni með í för, heldur fantagóður akstur því hann varð hálfri sekúndu fljótari í förum en keppinautarnir.

Felipe Massa á Ferrari, forystumaðurinn í titilkeppni ökuþóra,  gerði dýrkeypt akstursmistök og hefur keppni í aðeins níunda sæti.  Nick Heidfeld hefur keppni í fyrsta sinn á árinu framar en liðsfélagi hans Robert Kubica.

Kubica hætti í fyrri tilraun sinni vegna gruns um að loft væri að leka úr hjólbarða. Komst hann af þeim sökum ekki af stað í seinni tilrauninna. Setti því engan tíma í lokalotu tímatökunnar og hefur keppni tíundi.

Sebastian Vettel hjá Toro Rosso hefur verið öflugur á æfingum í dag og gær. Komst í lokalotuna í fyrsta sinn frá í fyrsta móti og hefur keppni áttundi, næst á undan Massa og Kubica og fimm sætum á undan liðsfélaga sínum Sebastien Bourdais.

Annað mótið í röð komust báðir Renaultarnir í lokalotuna. Hefja  Fernando Alonso og Nelson Piquet keppni í sjötta og sjöunda sæti.

David Coulthard vantaði aðeins 59 þúsundustu úr sekúndu á að komast meðal tíu fremstu í sínum síðasta formúlukappakstri í heimalandi sínu. Þriðja árið í röð komsti landi hans Jensons Button hjá Honda ekki upp úr lokalotunni á heimavelli í Silverstone. Button varð 17. og einu sæti á eftir liðsfélaga sínum Rubens Barrichello.

Niðurstaða tímatökunnar varð sem hér segir:

Röð	Ökuþór	Bíll	Lota1	Lota2	Lota 3	Hri.
1.	Kovalainen	McLaren	1:19.957	1:19.597	1:21.049	15
2.	Webber	Red Bull	1:20.982	1:19.710	1:21.554	16
3.	Räikkönen	Ferrari	1:20.370	1:19.971	1:21.706	18
4.	Hamilton	McLaren	1:20.288	1:19.537	1:21.835	13
5.	Heidfeld	BMW	1:21.022	1:19.802	1:21.873	16
6.	Alonso	Renault	1:20.998	1:19.992	1:22.029	15
7.	Piquet	Renault	1:20.818	1:20.115	1:22.491	19
8.	Vettel	Toro Rosso	1:20.318	1:20.109	1:23.251	16
9.	Massa	Ferrari	1:20.676	1:20.086	1:23.305	16
10.	Kubica	BMW	1:20.444	1:19.788		12
11.	Coulthard	Red Bull	1:21.224	1:20.174		14
12.	Glock	Toyota	1:20.893	1:20.274		14
13.	Bourdais	Toro Rosso	1:20.584	1:20.531		16
14.	Trulli	Toyota	1:21.145	1:20.601		13
15.	Nakajima	Williams	1:21.407	1:21.112		14
16.	Barrichello	Honda	1:21.512			9
17.	Button	Honda	1:21.631			11
18.	Rosberg	Williams	1:21.668			6
19.	Sutil	Force India	1:21.786			9
20.	Fisichella	Force India	1:21.885			8