Sebastian Vettel hjá Red Bull fór með öruggan sigur af hólmi í Evrópukappakstrinum í Valencia. Áberandi er þó framför Ferrarifáksins því Fernando Alonso hrellti þá Mark Webber löngum og hafði annað sætið að lokum. 

Vettel lét tækifærið ekki úr hendi sleppa er hann tók af stað af ráspól og vann fljótt nógu mikið forskot til að Webber, er ræsti annar, gæti ekki brúkað hreyfivænginn til að leggja til atlögu við hann.

Aftur á móti vann Alonso sig bæði fram úr Lewis Hamilton hjá McLaren og liðsfélaga sínum Felipe Massa í ræsingunni og eftir það dró hann jafnt og þétt á Webber, uns hann komst fram úr með hjálp hreyfivængsins á 21. hring af 57.

Mikil herfræðibarátta var í gangi milli Ferrari og Red Bull og tókst Webber að endurheimta annað sætið aftur af Alonso í öðru dekkjastoppi. Baráttan milli þeirra eftir það í algleymi og sneri Alonso dæminu við í lokastoppinu. Út úr því kom hann rétt fyrir framan Webber, sem stoppaði þó nokkrum hringjum fyrr og búinn að ná upp hita í dekkin, en það nýttist þó Red Bull þórnum ekki.

Segja má að bílar Red Bull og Ferrari hafi verið í sérflokki og í samanburði við þá áberandi hversu dapran dag McLaren og Mercedes áttu. Virðist sem Ferrarifákurinn sé á góðri leið með að verða jafngóður bíl Red Bull sem er þó enn nokkuð snarpari í tímatökum - sem gerir gæfumun.

Sigurinn er sá sjötti sem Vettel vinnur á árinu og sá 16. á ferlinum. Um tíma virtist Alonso ætla draga hann uppi svo spennan jókst á ný. Komst í innan við þriggja sekúndna tæri við hann rétt eftir síðasta stoppið. En lengra komst hann ekki og virtust hörðu dekkin jafnvel nýtast Red Bull bílnum betur. Má því segja að sigur Vettels hafi því verið nokkuð öruggur.

Spænski ökuþórinn Jaime Alguersuari hjá Toro Rosso átti góðan dag. Hafnaði í áttunda sæti eftir að hafa byrjað í því 18. Hjálpaði til að hann stoppaði aðeins tvisvar til að skipta um dekk meðan flestir keppinautanna stoppuðu a.m.k. þrisvar.

Sergio Perez hjá Sauber freistaði þess einn að taka einungis eitt stopp. Litlu munaði að það dygði til stiga því hann lauk keppni í ellefta sæti.

Möguleikar Michaels Schumacher á stigum hurfu eins og dögg fyrir sólu er hann rakst utan í Vitaly Petrov á leið út úr fyrsta dekkjastoppi. Framvængur Schumachers lenti í dekkjum Renaultins svo Schumacher varð að fá nýjan. Féll við það niður í 22. sætið og varð á endanum í 17. sæti.

Niðurstaða kappakstursins varð annars sem hér segir:

Röð	Ökuþór	Bíll	Tími
1.	Vettel	Red Bull	1:39.36.169
2.	Alonso	Ferrari	+10.891
3.	Webber	Red Bull	+27.255
4.	Hamilton	McLaren	+46.190
5.	Massa	Ferrari	+51.705
6.	Button	McLaren	+1.00.000
7.	Rosberg	Mercedes	+1.38.000
8.	Alguersuari	Toro Rosso	hring eftir
9.	Sutil	Force India	1 hr. eftir
10.	Heidfeld	Renault	1 hr. eftir
11.	Perez	Sauber	1 hr. eftir
12.	Barrichello	Williams	1 hr. eftir
13.	Buemi	Toro Rosso	1 hr. eftir
14.	Di Resta	Force India	1 hr. eftir
15.	Petrov	Renault	1 hr. eftir
16.	Kobayashi	Sauber	1 hr. eftir
17.	Schumacher	Mercedes	1 hr. eftir
18.	Maldonado	Williams	1 hr. eftir
19.	Kovalainen	Lotus	2 hr. eftir
20.	Trulli	Lotus	2 hr. eftir
21.	Glock	Virgin	2 hr. eftir
22.	D'Ambrosio	Virgin	2 hr. eftir
23.	Liuzzi	Hispania	3 hr. eftir
24.	Karthikeyan	Hispania	3 hr. eftir