Sebastian Vettel hjá Red Bull var í þessu að vinna ráspól kappakstursins í Singapúr. Liðsfélagi hans Mark Webber varð annar og Jenson Button hjá McLaren þriðji þótt hann missti af síðustu tímatilrauninni. Er þetta 11. ráspóll Vettels á árinu og sá 26. á ferlinum.

Vettel var öflugur í öllum þremur lotum tímatökunnar en Webber og ökumenn McLaren ógnuðu honum þó alla tíð. En enginn átti svar við honum í lokin og því stendur heimsmeistarinn vel að vígi fyrir kappaksturinn á morgun. Getur hann landað titlinum annað árið í röð á morgun, að því tilskyldu að keppinautunum farnist eigi allvel.

Með þessu hafa ökumenn Red Bull unnið alla ráspóla ársins, sem er einstakur árangur. Vettel ók hraðast í öllum lotunum þremur. Meðan ökumenn McLaren og Ferrari flæktust hverjir fyrir öðrum í fyrri umferð lokalotunnar naut Vettel hreinnar brautar og setti í fyrri umferð hennar tímann sem dugði honum til ráspóls.

Þegar að síðustu tímatilrauninni kom var Lewis Hamilton hjá McLaren í öðru sæti. Hann komst hins vegar ekki úr bílskúrnum í tæka tíð og missti af henni. Á síðasta tímahring unnu bæði Webber og Jenson Button hjá McLaren sig fram úr og engu munaði að Fernando Alonso hjá Ferrari gerði hið sama, en allir bættu þeir sig þessir þrír á lokahringnum.

Bílarnir raðast þannig upp á rásmarkinu á morgun, að á fremstu rásröð verða tveir Red Bull, á þeirri næstu tveir McLaren, á þeirri þriðju tveir Ferrari og á þeirri fjórðu tveir Mercedes og á þeirri fimmtu tveir Force India. Er þetta afar óvenjuleg uppröðun.

Þrír ökumenn kusu að spara dekkjaforða sinn til morguns og óku ekkert í lokalotunni; Michael Schumacher hjá Mercedes og báðir ökumenn Force Indian, Adrian Sutil og Paul di Resta. 

Í fyrstu umferð tímatökunnar urðu Kamui Kobayashi hjá Sauber á slæm mistök í hlykknum í tíundu beygju. Fór of innarlega á bríkurnar með þeim afleiðingum að bíllinn tókst á loft og hafnaði á öryggisvegg. Hafði hann átt í erfiðleikum með þessa beygju á öllum æfingunum þremur fyrir tímatökurnar.

Niðurstaða þeirra - og þar með rásröð morgundagsins - varð annars sem hér segir:

Röð	Ökuþór	Bíll	tími	Bil
1.	Sebastian Vettel	Red Bull	1:44.381
2.	Mark Webber	Red Bull	1:44.732	+0.351
3.	Jenson Button	McLaren	1:44.804	+0.423
4.	Lewis Hamilton	McLaren	1:44.809	+0.428
5.	Fernando Alonso	Ferrari	1:44.874	+0.493
6.	Felipe Massa	Ferrari	1:45.800	+1.419
7.	Nico Rosberg	Mercedes	1:46.013	+1.632
8.	Michael Schumacher	Mercedes	enginn tími
9.	Adrian Sutil	Force India	enginn tími
10.	Paul di Resta	Force India	enginn tími
11.	Sergio Perez	Sauber	1:47.616	+2.685
12.	Rubens Barrichello	Williams	1:48.082	+3.151
13.	Pastor Maldonado	Williams	1:48.270	+3.339
14.	Sebastien Buemi	Toro Rosso	1:48.634	+3.703
15.	Bruno Senna	Renault	1:48.662	+3.731
16.	Jaime Alguersuari	Toro Rosso	1:49.862	+4.931
17.	Kamui Kobayashi	Sauber	enginn tími
18.	Vitaly Petrov	Renault	1:49.835	+3.438
19.	Heikki Kovalainen	Lotus	1:50.948	+4.551
20.	Jarno Trulli	Lotus	1:51.012	+4.615
21.	Timo Glock	Virgin	1:52.154	+5.757
22.	Jerome D'Ambrosio	Virgin	1:52.363	+5.966
23.	Daniel Ricciardo	Hispania	1:52.404	+6.007
24.	Tonio Liuzzi	Hispania	1:52.810	+6.413