Verulegt tap varð á rekstri Williamsliðsins í fyrra, eða 34,3 milljónir punda, sem svarar til6,9 milljarða króna.
Í nýbirtu uppgjöri er látin í ljós bjartsýni um að fjárhagsstaðan muni batna til muna í ár.
Williams hóf umtalsverða uppstokkun á starfseminni 2013 í þeirri von að geta eflt keppnislið sitt í formúlu-1 og þénað vel á verkfræðiþjónustu.
Tekjur fyrirtækisins minnkuðu úr 130,4 milljónum árið 2013 í 90,2 milljónir 2014. Reikningarnir endurspegla þó ekki verulegar framfarir liðsins í formúlu-1 í fyrra er það endaði vertíðina í þriðja sæti. Tekjuauki af því skilar sér ekki fyrr en í ár, 2015.
Af þeim sökum er Williams sannfærður um að fjárhagsleg framtíð liðsins verði í góðu lagi.