Lewis Hamilton marði liðsfélaga sinn Nico Rosberg á lokaæfingunni fyrir tímatökuna í Sotsjí. Ók hann hringinn á1:36,403 mínútum en Rosberg var 68 þúsundustu úr sekúndu lengur í förum, á 1:36,471 mín. Þriðji varð Sebastian Vettel á Ferrari á 1:37,007 mín.

Hamilton og Rosberg skiptust á að setja hraðasta hring og voru í nokkrum sérflokki því Vettel var 0,604 sekúndum á eftir. Og  liðsfélagi hans Kimi Räikkönen var enn lengra á eftir í fjórða sæti á 1:37,727 mín., eða vel yfir sekúndu á eftir Mercedesmönnunum.

Williamsbílarnir urðu í fimmta og sjötta sæti, Felipe Massa á 1:37,918 og Valtteri Bottas á 1:37,985 mín. Max Verstappen á Toro Rosso átti sjöunda besta tímann, 1:38,133 mín., og fyrsta tuginn fylltu svo Jenson Button hjá McLaren (1:38,260), Carlos Sainz hjá Toro Rosso (1:38,465) og Sergio Perez hjá Force India (1:38,542).

Framan af voru ökumenn Red Bull meðal fremstu en er á leið tóku aðrir fram úr svo að Daniel Ricciardo átti á endanum ellefta besta tímann (1:38,622) og Daniil Kvyat (1:39,047) þann þrettánda besta. Milli  þeirra varð svo Fernando Alonso á McLaren (1:38,633).