Luiz Felipe Scolari hefur tekið við þjálfun brasilíska liðsins Grêmio. Þetta staðfesti félagið í dag en einungis þrjár vikur eru liðnar frá því að Scholari stýrði brasilíska landsliðinu á heimsmeistaramótinu í knattspyrnu. Þar tapaði liðið sem kunnugt er 7:1 gegn Þýskalandi í undanúrslitum sem er stærsta tap liðsins á heimsmeistaramóti frá upphafi. Scholari sagði starfi sínu lausu eftir keppnina.
„Höfðinn er snúinn aftur. Felipe er nýi þjálfarinn“ sagði á heimasíðu félagsins um Scholari en hann stýrði félaginu árið 1987 og árin 1993-1996 með góðum árangri en hann gerði félagið að brasilískum deildarmeisturum árið 1996, í annað skipti í sögu félagsins.