Aron Jóhannsson fékk ekki tækifæri með bandaríska landsliðinu í knattspyrnu í nótt þegar það hóf keppni í Gullbikarnum, úrslitakeppni meistaramóts Norður- og Mið-Ameríku, með því að sigra Hondúras, 2:1, í Frisco í Texas.
Clint Dempsey, fyrrverandi leikmaður Tottenham og Fulham, skoraði bæði mörk Bandaríkjamanna og kom þeim í 2:0 með marki í hvorum hálfleik en Carlos Israel minnkaði muninn fyrir Hondúras tuttugu mínútum fyrir leikslok.
Panama og Haití skildu jöfn, 1:1, í hinum leik A-riðils í nótt en þessar fjórar þjóðir skipa riðilinn. Tólf lið leika í þremur riðlum og átta þeirra komast áfram í átta liða úrslitin.
Aron sat á bekknum allan tímann. Dempsey og Jozy Altidore voru í framlínu bandaríska liðsins og Chris Wondolowski kom inn á fyrir Altidore en Dempsey lék allan leikinn.
Tveir leikmenn íslenskra liða eru mættir með landsliðum sínum í Gullbikarinn. Pablo Punyed úr Stjörnunni leikur með El Salvador, sem mætir Kanada í sínum fyrsta leik næstu nótt og Jonathan Glenn úr ÍBV leikur með Trínidad og Tóbagó sem leikur við Guatemala annað kvöld.