Real Madrid verður án tveggja miðvarða sinna næstu vikurnar. Sergio Ramos, fyrirliði liðsins fór nýverið í aðgerð á öxl og verður ekki meira með á árinu.
Nú er svo ljóst að Raphael Varane verður frá næstu þrjár vikurnar hið minnsta vegna meiðsla sem hann hlaut í leik gegn Shakhtar Donetsk í vikunni.
Varane er meiddur aftan í læri, en þessi 22 ára gamli Frakki hefur verið í lykilhlutverki hjá Real Madrid á þessu tímabili.
Real Madrid heimsækir Eibar í spænsku efstu deildinni á sunnudaginn næstkomandi. Real Madrid hefur fengið á sig sjö mörk í síðustu tveimur leikjum liðsins og varnarleikur liðsins hefur ekki verið upp á marga fiska undanfarið.