Þorlákur með bestu akademíu Svíþjóðar

Brommapojkarna frá Stokkhólmi var með bestu akademíu fyrir ungt knattspyrnufólk í Svíþjóð árið 2015, að mati sænska knattspyrnusambandsins, og þetta er sjötta árið í röð sem félagið fær þessa viðurkenningu.

Þorlákur Árnason er yfirmaður akdemíunnar en hann tók við henni í ársbyrjun 2015 eftir langan þjálfaraferil heima á Íslandi. Hann þjálfaði síðast kvennalið Stjörnunnar með góðum árangri áður en hann flutti til Svíþjóðar eftir tímabilið 2014.

Akademían, sem nær yfir barna- og unglingastarf félagsins, er tvískipt. Til skamms tíma var hún aðeins fyrir drengi á aldrinum 8-19 ára. Brommapojkarna var líka með stúlknaflokka en ekki jafn skipulagt starf. Þorlákur breytti því og stofnaði á síðasta ári akademíu fyrir 12-19 ára stúlkur.

Brommapojkarna hefur alið upp fjölda öflugra knattspyrnumanna undanfarin ár og selt marga þeirra til atvinnuliða erlendis. Þá hefur meistaraflokkslið félagsins í karlaflokki að stærstum hluta verið byggt á uppöldum leikmönnum. Liðið lék í úrvalsdeildinni 2013 og 2014 en féll þá og féll aftur úr B-deildinni síðasta haust. Þá var Magni Fannberg þjálfari liðsins. Talið er fullvíst að dvöl liðsins í C-deild verði ekki löng.

Stigagjöf sænska knattspyrnusambandsins fyrir bestu akademíurnar er þannig en eftirtalin sjö félög eru svokölluð „fimm stjörnu félög“ Svíþjóðar:

1. Brommapojkarna, 3.778 stig
2. Malmö FF, 3.010 stig
3. Helsingborg, 2.471 stig
4. AIK, 2.374 stig
5. Elfsborg, 2.357 stig
6. IFK Gautaborg, 2.350 stig
7. Häcken, 2.254 stig

• Blogga um frétt