Knattspyrnumaðurinn Steven Caulker, sem lék meðal annars fyrir Tottenham Hotspur, Liverpool og Swansea City í ensku úrvalsdeildinni, leitar sér nú að nýju félagi fyrir næsta tímabil. Leitin er nokkuð óhefðbundin.
Caulker er 32 ára gamall miðvörður sem var síðast spilandi þjálfari Málaga City í fimmtu efstu deild Spánar og ákvað að setja inn færslu á LinkedIn, samfélagsmiðil sem leggur áherslu á allt tengt atvinnu og atvinnutækifærum.
„Kæra LinkedIn fjölskylda, nú verð ég að treysta á galdra ykkar. Ég er í leit að nýju félagi fyrir tímabilið 2024/2025.
Helst sem þjálfari en ég er ennþá opinn fyrir því að spila,“ skrifaði hann á samfélagsmiðlinum.
Caulker á að baki einn A-landsleik fyrir England, vináttulandsleik árið 2012, en skipti síðar um ríkisfang og er búinn að leika 13 A-landsleiki fyrir Síerra Leóne frá árinu 2022.