Zlatko Dalic hefur verið ráðinn þjálfari króatíska karlalandsliðsins í knattspyrnu, en hann tekur við liðinu af Ante Cacic sem var látinn taka pokann sinn eftir 1:1-jafntefli liðsins gegn Finnlandi í undankeppni HM 2018 í gær.
Dalic hefur stýrt Al-Ain frá Sameinuðu arabísku furstadæmunum síðustu þrjú árin, en hann kom liðinu í úrslitaleik Meistaradeildar Asíu á síðasta keppnistímabili.
Dalic mun stýra króatíska liðinu sem mætir Úkraínu í lokaumferð undankeppninnar. Króatía og Úkraína eru jöfn að stigum með 17 stig í öðru til þriðja sæti í I-riðlinum, en Ísland trónir á toppi riðilsins með 19 stig.
Liðið sem hafnar í efsta sæti riðilsins fer beint í lokakeppni heimsmeistaramótsins, en átta stigahæstu liðin í öðru sætum riðlanna níu í undankeppninni fara hins vegar í umspil um fjögur laus sæti í lokakeppninni.