Bandaríkjamaðurinn Bubba Watson sagði eftir að hafa tryggt sér sigur á Masters-mótinu í golfi í annað sinn á þremur árum í gærkvöld að þetta hefði verið allt öðruvísi en þegar hann sigraði á Augusta-National vellinum fyrir tveimur árum.
Watson stakk keppinautana af á 13. brautinni á lokahringnum í gærkvöld, náði þá þriggja högga forskoti á Jordan Spieth og Jonas Blixt frá Svíþjóð og lét það ekki af hendi á lokasprettinum.
„Þegar ég vann hérna fyrst var ég dálítið heppinn. Þessi sigur vannst hinsvegar með mikilli vinnu og einbeitingu. Eftir að hafa látið jakkann frá mér í fyrra vildi ég fá hann aftur. Ég sagði við Adam (Scott) að við skyldum bara skiptast á að fara í hann. Ég hef aldrei verið jafn hrifinn af græna litnum," sagði hinn 35 ára gamli Watson sem er sautjándi kylfingurinn til að vinna Masters oftar en einu sinni.