Dagur Sigurðsson verður næsti þjálfari þýska karlalandsliðsins í handknattleik og tilkynnt verður um ráðningu hans næstkomandi þriðjudag samkvæmt fréttum þýskra miðla í dag.
Dagur er núverandi þjálfari bikarmeistara Füchse Berlín en samningur hans við félagið rennur út næsta sumar og hann myndi því í kjölfarið geta einbeitt sér alfarið að því að stýra þýska landsliðinu.
Næsta stóra verkefni Þýskalands er HM í Katar í janúar sem liðið komst á eftir að IHF ákvað að meina Ástralíu þátttöku og breyta mótareglum sem varð til þess að Þýskaland hlaut forgang fram yfir Ísland eins og frægt er orðið.