„Það er því miður lítið að frétta af Þorgerði. Hún er í sinni endurhæfingu. Vonir standa til að hún geti byrjað að leika í febrúar en hvort af því verður er alltof snemmt að segja til um,“ sagði Atli Hilmarsson, faðir Þorgerðar Önnu, landsliðskonu í handknattleik og leikmanns þýska stórliðsins Leipzig.
Þorgerður Anna hefur lengi strítt við meiðsli í annarri öxlinni. Hún gat af þeim sökum lítið leikið með Flint-Tönsberg í Noregi á síðustu leiktíð auk þess sem meiðslin settu strik í reikning hennar síðasta keppnistímabilið sem hún lék með Val áður en hún hélt til Noregs.
Vonir stóðu til að Þorgerður hefði náð bata í sumar þegar hún gerði samning við Leipzig. Annað kom fljótlega á daginn. „Tíminn verður að skera úr um hvenær Þorgerður Anna kemst á skrið aftur,“ sagði Atli í gær.
Leipzig er í toppbaráttu í Þýskalandi og spilar í Meistaradeild Evrópu í vetur.