FH sigraði HK, 25:22, í úrvalsdeild karla í handknattleik, Olís-deildinni, í Digranesi í Kópavogi í kvöld.
Lárus Helgi Ólafsson átti sannkallaðan stórleik í marki HK. Hann varði 7 vítaköst og samtals á þriðja tug skota en það var ekki nóg fyrir Kópavogsliðið. HK var yfir í hálfleik, 14:12, en FH náði yfirhöndinni á upphafsmínútum síðari hálfleiks og hélt forystunni til leiksloka.
HK situr áfram á botni deildarinnar með aðeins 4 stig eftir 14 leiki en FH er komið með 18 stig í fjórða sæti deildarinnar.
Mörk HK: Þorgrímur Smári Ólafsson 5, Leó Snær Pétursson 4, Andri Þór Helgason 4, Garðar Svansson 3, Guðni Már Kristinsson 3, Valdimar Sigurðsson 2, Aron Gauti Óskarsson 1.
Mörk FH: Andri Berg Haraldsson 5, Daníel Matthíasson 5, Magnús Óli Magnússon 5, Ísak Rafnsson 4, Benedikt R. Kristinsson 2, Ragnar Jóhannsson 2, Hlynur Bjarnason 1, Andri Hrafn Hallsson 1.
20.58 - Leik lokið, 22:25. FH innbyrðir tvö stig eftir harðan slag lengi vel.
20.57 - Sigur FH er í höfn. Hraðaupphlaup og mark, 21:25, þegar ein mínúta er eftir.
20.55 - Tvær mínútur eftir og HK minnkar muninn í 20:23 en FH svarar strax, 20:24. HK strax aftur, 21:24.
20.51 - Ekkert skorað í langan tíma. Staðan enn 19:22 og 5 mínútur eftir. HK tekur leikhlé.
20.45 - Lárus Helgi Ólafsson í marki HK ver sitt sjöunda vítakast í kvöld. En HK virðist ekki ætla að nýta sér það. Staðan er 19:22 og átta mínútur eftir.
20.42 - FH er að síga framúr, staðan er 18:21 og tólf mínútur eftir.
20.40 - Nú er það Ágúst Elí Björgvinsson í marki FH sem tekur sig til og ver vítakast. Kemur í veg fyrir að HK jafni metin. FH fær strax vítakast og skorar loksins, 17:19.
20.38 - Seinni hálfleikur hálfnaður, staðan er 17:18 en Lárus Helgi Ólafsson í marki HK var að verja sitt sjötta vítakast í kvöld, nú frá Ragnari Jóhannssyni!
20.32 - Ellefu mínútur búnar af seinni hálfleik og staðan er 16:18. HK náði loks að svara með marki Þorgríms Ólafssonar úr vítakasti eftir fjögur mörk í röð.
20.28 - HK-ingar eru í vandræðum þessar mínúturnar og búnir að missa þrjá menn af velli á stuttum tíma. FH nýtir sér það strax og kemst yfir í fyrsta sinn í seinni hálfleik, 15:16.
20.26 - FH jafnar metin í 15:15, tveimur mönnum fleiri, þegar 7 mínútur eru liðnar af síðari hálfleik.
20.22 - Fjórar mínútur búnar af seinni hálfleik og HK er yfir, 15:14. Lárus er búinn að verja eitt vítakast á upphafsmínútunum og þar með fjögur alls í leiknum!
20.12 - Hálfleikur í Digranesi og HK er óvænt með forystu gegn FH, 14:12. Lárus Ólafsson hefur átt stórleik í marki Kópavogsliðsins.
20.04 - HK komst tveimur mörkum yfir, FH hefur minnkað muninn í 12:11 eftir 27 mínútur. Bjarki Sigurðsson þjálfari HK tekur leikhlé.
19.59 - HK nær forystunni, 11:10, eftir 23 mínútna leik, og FH missir Ragnar Jóhannsson af velli í tvær mínútur um leið.
19.56 - Áfram jafnt í Digranesi og staðan 10:10 eftir 21 mínútur.
19.52 - HK gefur sig ekki og jafnar metin í 9:9 eftir 19 mínútur. Halldór Jóhann Sigfússon þjálfari FH tekur leikhlé til að hrista upp í sínum mönnum.
19.50 - FH sígur framúr á ný og staðan er 7:9 eftir 17 mínútur.
19.45 - HK jafnar metin og staðan er 4:4 eftir 12 mínútur.
19.44 - Staðan eftir 10 mínútur er 2:3 og Lárus Ólafsson í marki HK hefur varið tvö vítaköst FH-inga.
19.37 - Staðan eftir 5 mínútur er 1:2.