Íslendingaliðin Holstebro og Aalborg unnu bæði leiki sína í dönsku úrvalsdeildinni í handknattleik í kvöld. Vignir Svavarsson skoraði þrjú mörk fyrir Holstebro sem hafði betur gegn Kolding, 24:23, á útivelli.
Stefán Rafn Sigurmannsson skoraði fjögur mörk og Arnór Atlason og Janus Daði Smárason skoruðu eitt mark hvor í 37:34 sigri Aalborg á GOG.
Aalborg er með fjögurra stiga forskot á Holstebro og Bjerringbro/Silkeborg á toppi deildarinnar. Aron Kristjánsson þjálfar lið Aalborg.