Isiah Thomas á sjúkrahús eftir sjálfsmorðstilraun
Það hefur hallað undan fæti hjá Thomas eftir að hann lék við hvurn sinn fingur í búningi Pistons. mbl.is
Frægðarhallarmeðlimur NBA, Isiah Thomas, var lagður inn á sjúkrahús á föstudag, en hann fannst meðvitundarlaus á heimili sínu í New York, eftir að hafa tekið inn óhóflegt magn svefntaflna. Engar upplýsingar hafa borist um heilsu hans ennþá.
Thomas, sem er 47 ára gamall, þótti einn besti leikmaður NBA-deildarinnar á níunda áratugnum, er hann lék með hinum „vondu strákunum“ í Detroit Pistons, en liðið varð NBA meistari árin 1989 og 1990, og var Thomas valinn besti leikmaður úrslitakeppninnar (MVP) sama ár.
Eftir að leikferli Thomas lauk gerðist hann þulur hjá NBC sjónvarpsstöðinni og síðar eigandi CBA áhugamannadeildarinnar, sem fór á hausinn undir hans stjórn. Hann gerðist þá þjálfari Indiana Pacers en þótti ekki standa undir væntingum sem þjálfari, frekar en hjá New York Knicks, sem ráku hann þann 18. apríl síðastliðinn.
Þá hefur hegðun Thomas utanvallar verið þó nokkuð í sviðsljósinu og hefur hann verið ásakaður um kynferðislega áreitni í garð samstarfskonu sinnar hjá NY Knicks, auk þess sem hann samsinnsti Dennis Rodman um, að Larry Bird væri ofmetinn sökum litarhafts síns, en hann væri hvítur leikmaður í deild fullri af lituðum leikmönnum.
