Íþróttir | Körfubolti | mbl | 28.8.2015 | 21:28

Ragnar tók vel á pólska skrímslinu

Það styttist í stóru stundina hjá Ragnari Nathanaelssyni og félögum í íslenska landsliðinu. mbl.is/Eva Björk

Finnur Freyr Stefánsson, aðstoðarþjálfari karlalandsliðsins í körfuknattleik, segir klaufaleg mistök liðsins í seinni hálfleik hafa reynst dýrkeypt í tapinu gegn Póllandi í kvöld, 80:65, á æfingamótinu í Póllandi fyrir Evrópumótið sem hefst eftir rúma viku.

„Þeir byrjuðu sterkir en við náðum að koma okkur í gegnum það. Logi Gunnarsson kom mjög sterkur inn af bekknum og þegar sóknirnar gengu ekki upp þá setti hann niður stór skot og kom okkur í gírinn,“ sagði Finnur, en Pólverjar voru einu stigi yfir í hálfleik.

„Lokin á fyrri hálfleiknum voru fín og við fengum tækifæri til að komast yfir. Í byrjun seinni hálfleiks vorum við klaufar og misstum svolítið boltann, og það var kannski saga seinni hálfleiks. Við fengum hraðar sóknir í bakið eftir að hafa tapað boltanum og annað slíkt. Við vorum til dæmis fimm stigum undir þegar einhverjar fimm mínútur voru eftir en töpuðum boltanum og fengum þrist í andlitið. Þetta var frekar súrt því mér fannst við ekkert spila vel heldur geta gert mikið betur,“ sagði Finnur, og tók undir að það væri ágætt að hafa átt í fullu tré við pólska liðið sem leikur í A-riðli á Evrópumótinu.

Gátum gert mikið betur

„Það er mjög fínt að spila svona, án Pavels [Ermolinski] og Jóns [Arnórs Stefánssonar] að miklu leyti, enda styttist í mótið og við verðum að gjöra svo vel og nýta okkar tækifæri. Ég hef trú á því að þegar á hólminn verður komið fari skotin niður, og við búum til hörkuflotta leiki. Við finnum að við eigum alveg roð í þessi lið, og getum alveg unnið þau. Sjálfstraustið og trúin í liðinu eykst með hverjum degi,“ sagði Finnur, sem hrósaði sérstaklega hinum hávaxna Ragnari Nathanaelssyni:

„Logi og Ægir komu mjög flottir inn af bekknum, og Ragnar átti sínar bestu mínútur í undirbúningnum hingað til. Hann tók vel á pólska skrímslinu Marcin Gortat [leikmanns Washington Wizards í NBA-deildinni]. En það var súrt að tapa þessu því við gátum gert mikið betur og gáfum þeim auðveldar körfur með því að tapa boltanum of auðveldlega,“ sagði Finnur.