Einn besti leikmaður NBA-deildarinnar í körfuknattleik, Kevin Durant, hefur ákveðið að söðla um og ganga til liðs við Golden State Warriors.
Durant hefur undanfarin ár leikið með Oklahoma City Thunder. Samningur hans við Thunder rann út í sumar og því var honum frjálst að semja við hvaða lið sem honum þóknaðist.
Golden State Warriors varð NBA-meistari í fyrra en tapaði í úrslitaeinvíginu gegn Cleveland Cavaliers í ár. Durant hefur verið með bestu mönnum deildarinnar síðan hann hóf leik þar árið 2007, með Seattle SuperSonics, sem flutti þaðan til Oklahoma.