Grindavík tryggði sér í kvöld sæti í undanúrslitum Íslandsmótsins í körfuknattleik kvenna með því að leggja Þór frá Akureyri örugglega að velli, 93:75, í þriðja leik liðanna í átta liða úrslitum í Smáranum í Kópavogi.
Grindavík vann einvígið 3:0 og þar með er þátttöku Þórsara á Íslandsmótinu lokið í ár.
Grindvíkingar hófu leikinn af miklum krafti og náðu til að mynda 11 stiga forystu, 18:7, þegar fyrsti leikhluti var rúmlega hálfnaður.
Þór tók þá við sér og lagaði stöðuna, sem var 25:20 að loknum fyrsta leikhluta.
Mikið jafnræði var með liðunum í öðrum leikhluta en staðan í hálfleik var 47:40, Grindavík í vil.
Í síðari hálfleik óx Grindvíkingum ásmegin og voru þeir 15 stigum yfir, 73:58, að loknum þriðja leikhluta.
Fjórði leikhluti reyndist nokkurs konar formsatriði fyrir Grindavík og niðurstaðan að lokum öruggur 18 stiga sigur.
Eve Braslis fór á kostum í liði Grindavíkur er hún skoraði 26 stig og tók tíu fráköst. Sarah Sofie Mortensen bætti við 19 stigum.
Lore Devos var stigahæst hjá Þór með 24 stig og átta fráköst.