Fréttir frá nokkrum veiðisvæðum SVFR

Veiði fer almennt vel af stað á svæðum Stangaveiðifélags Reykjavíkur samkvæmt samantekt frá félaginu.

Fram kemur að Langá hafi verið opnuð með látum og þar lauk tveggja daga holl nýverið veiðum með 73 laxa á land á aðeins átta stangir. Miklar göngur eru upp ána þessa dagana og teljarinn við Skuggafoss fór yfir eitt þúsund laxa laust fyrir miðnætti í gær, 27. júní. Laxinn er kominn upp um alla á og veiddi síðasta holl best á miðsvæðinu og uppi á Fjalli. Góða veiðin hélt áfram í gær og heyrðist af einni stöng sem landað hafði átta löxum á morgunvaktinni, þar af einum 86 cm.

Þá kemur fram að Hítará sé komin yfir 100 laxa veiði, sem er stórkostlegt á þessum tíma. Stærsti laxinn af þeim 104 sem landað hefur verið hingað til var 94 cm hængur tekinn á Kolskegg. Þarna er mikið líf og hafa menn verið að taka laxa á hitch, Sunray Shadow, Kolskegg, Grænfriðung, Frances og Kolskegg svo fátt eitt sé nefnt. Síðasta hollið í ánni endaði með 14 laxa á land.

Sagt er að Haukadalsá hafi einnig staðið fyrir sínu og þar eru hollin að landa þetta 10 til 15 löxum í bland við að missa mikið. Líf á öllum svæðum árinnar og margir staðir inni. Í Horninu, Berghyl, Bjarnarlögn og Blóta eru nokkrir 100+ cm drekar að stríða og halda veiðimönnum við efnið með því að láta glitta í sig öðru hvoru, rétt þegar menn eru við það að gefast upp.

Í Hjaltadalsá og Kolku kom fyrsti lax sumarsins í Fosshylnum um síðustu helgi. Þar á bæ þykir þetta afar snemmt og það hafi glatt menn einnig mikið að sjá að bleikjan var einnig mætt á svæðið. Síðast þegar lax kom úr ánni í júní árið 2010 var fínasta laxveiði í ánni sem skilaði rétt um 80 löxum.

Þá kemur fram að heyrst hafi af veiðimönnum sem opnuðu svæði Þrastarlundar, Alviðru og Bíldsfells í Soginu um helgina. Veiðin fór óskaplega vel af stað, veiðimenn í Þrastarlundi lönduðu tveimur löxum, í Alviðru komu þrír á land og í Bíldsfelli tveir laxar.

Þá eru laxar komnir á land í Andakílsá, þar af þrír í gær.

• Blogga um frétt

Seinustu hundraðkallar sumarsins