Fiskistofa fékk ábendingar um það í byrjun september að regnbogasilungur hefði veiðst í Mjólká í Arnarfirði og var eftirlitsmaður sendur á staðinn til að kanna með málið. Tveggja daga eftirlitsferð leiddi í ljós að regnbogasilung var að finna í mörgum ám í Patreksfirði, Tálknafirði, Arnarfirði og Dýrafirði.
Regnbogasilungur er ekki náttúrulegur í íslenskum ám eða vötnum, en hann er notaður í fiskeldi hér á landi. Vitað er um að minnsta kosti eitt fiskeldisfyrirtæki á Vestfjörðum sem elur regnbogasilung í sjókvíum.
Samkvæmt upplýsingum frá Fiskistofu hefur engin tilkynning borist um að slysaslepping hafi orðið í fiskeldi á Vestfjörðum, en samkvæmt 13. grein laga um fiskeldi nr. 71/2008 ber rekstraraðilum í fiskeldi að tilkynna um slík slys.
Staðfestar upplýsingar liggja fyrir að regnbogasilungur hafi núna í haust veiðst í ám frá Húnvatnssýslu og suður Faxaflóa og jafnvel víðar.
Landssamband veiðifélaga hefur lýst þungum áhyggjum af þessu og ekki síst fyrirhuguðu laxeldi á Vestfjörðum og annars staðar um landið. Í dag sendi félagið bréf til Gunnars Braga Sveinssonar sjávarútvegs- og landbúnaðarráðherra og Sigrúnar Magnúsdóttur Umhverfisráðherra þar sem þess er krafist að óháð rannsókn fari fram á því hvað orsakaði það að regnbogasilungur virðist hafa sloppið út í miklu magni á Vestfjörðum.
Einnig setur Landssambandið við það spurningar hvort eftirlit er sé nægjanlegt með starfsemi sjóeldiskvíafyrirtækja til að standast þær kröfur sem fram koma í áðurgreindum lögum um fiskeldi.
Þá hefur Orri Vigfússon hjá Verndarsjóði villtra laxa (NASF) tekið saman upplýsingar um hvar regnbogasilungur hefur komið fram í íslenskum ám og vötnum. Þar á bæ er menn líka afar áhyggjufullir af því að regnbogasilungur sleppi út í íslenskt vistkerfi og segja þetta hliðstætt umhverfisslys og átti sér stað við innflutning minka til Íslands á fjórða áratug síðustu aldar. Þá veki þetta upp áleitnar spurningar um hvað verði um eldislax sem kunni að sleppa úr sjókvíum með svipuðum hætti og nú hefur verið staðfest með regnbogasilunginn.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |