Veiðiþjófur gómaður í Norðurá

Inn á vef Skessuhornsins er greint frá því að franskur ferðamaður hafi verið gripinn glóðvolgur seint í gærkvöldi við spúnaveiðar í laxastiganum í fossinum Glanna í Norðurá í Borgarfirði.

Fram kemur að Magnúsi Fjeldsted veiðiverði hafi verið gert viðvart á tíunda tímanum í gærkvöldi um að tveir menn væru þarna á ferð við veiðar. Fór hann á staðinn og gerði lögreglu jafnframt viðvart sem kom á vettvang og tók niður upplýsingar. 

Haft er eftir Magnúsi að um einn mann hafi verið að ræða þegar hann kom á svæðið og var fisklaus. Hann hafi þó greinilega verið meðvitaður um að hann væri að brjóta af sér með þessu athæfi og þegar honum var tjáð að þetta yrði lögreglumál þá skyldi hann allt í einu ekki orð í ensku. Lögreglan hafi í framhaldinu rætt við manninn með aðstoð Google translate-þýðingarforritsins. 

Að sögn Magnúsar mun veiðifélagið að öllum líkindum leggja fram kæru eins og venja er í slíkum málum og má maðurinn búast við hárri fjársekt áður en hann heldur af landi brott.

• Blogga um frétt

Seinustu hundraðkallar sumarsins