Ágætu veiðisumri lokið hjá Hreggnasa

Samkvæmt upplýsingum frá Veiðifélagsinu Hreggnasa þá er laxveiði lokið á veiðisvæðum félagsins þetta sumarið og eru menn nokkuð sáttir með heildarveiðina í þeim ám sem félagið hefur á sínum snærum.

Fram kemur að Laxá í Dölum endaði með um 860 laxa heildarveiði, en þar er veitt er á fjórar til sex stangir. Þetta er talsvert langt frá heildarveiðinni í fyrra þegar 1711 laxar komu á land. Menn eru þó sáttir við niðurstöðu sumarsins því að hlutfall stórlaxa á bilinu 85 til 100 cm var mjög gott. Ljóst er að mikið af fiski er eftir í ánni líkt og síðustu tvö ár til að tryggja viðgang næstu kynslóða.

Þá var góð veiði í Grímsá og er óstaðfest lokatala 1.290 laxar sem er nálægt meðalveiði síðustu 30 ára en rúmlega tvöföldun frá heildarveiðinni í fyrra þegar 608 laxar veiddust.  Fram kemur að þveráin Tungá, sem rennur í Grímsá við hið rómaða Oddstaðafljót, hafi verið full af fiski við lokun árinnar. Þetta þykir lofa góðu varðandi framtíðina því Tungá er mikilvæg fyrir seiðabúskap Grímsár.

Í Laxá í Kjós var sumarið nokkuð skrýtið því júní og júlí voru mjög góðir, en ágúst olli hins vegar miklum vonbrigðum því fimm vikna þurrkar settu mark sitt á veiðina. Þegar loks fór að rigna í september veiddist þó ágætlega. Lokatölur eru um 850 laxar en því til viðbótar veiddist mikið af vænum sjóbirtingi frá 4 til 16 pund. Þetta er talsvert betri veiði en árið 2016 þegar að að 601 fiskar komu á land.

Veiðin var almennt fremur róleg á norðausturlandi þetta sumarið og var Svalbarðsá engin undantekning frá því. Þar veiddust 338 laxar á tvær til þrjár stangir. Þetta er nokkuð svipað heildarveiðinni í fyrra þegar 368 laxar veiddust.

• Blogga um frétt

Seinustu hundraðkallar sumarsins