Bandarískur dómari í borginni San Diego gerði hugbúnaðarfyrirtækinu Microsoft í gærkvöldi að greiða fransk-bandaríska fyrirtækinu Alcatel-Lucent 1,5 milljarða dala, jafnvirði 100 milljarða íslenskra króna, fyrir að brjóta gegn einkaleyfisreglum. Microsoft segist telja að dómurinn byggist ekki á lögum eða staðreyndum og honum verði áfrýjað.
Fyrirtækið Alcatel höfðaði mál fyrir bandarískum dómstóli árið 2003 og hélt því fram að samstarfsfyrirtæki Microsoft, þar á meðal tölvuframleiðendurnir Dell og Gateway, notuðu hugbúnað frá Microsoft sem bryti gegn einkaleyfislögum.
Málið snýst um MP3 skráaspilunartækni, sem notuð er í Media Player hugbúnaði Microsoft. Alcatel-Lucent heldur því fram, að tækni sem notuð er til að kóða og þýða hljóðskrár sé brot gegn einkaleyfisvörðum rétti fyrirtækisins.
Microsoft segist hins vegar hafa greitt þýska fyrirtækinu Fraunhofer-Gesellschaft 16 milljónir dala til að nota hina umdeildu MP3 tækni.