Glitnir spáir stýrivaxtalækkun á fyrsta ársfjórðungi 2008

Greining Glitnis hefur endurskoðað stýrivaxtaspá sína meðal annars í ljósi nýlegrar úthlutunar á þorskkvóta fyrir næsta fiskveiðiár, vaxtaákvörðunar Seðlabankans og þeirra orða sem bankinn lét falla samhliða. Spáir Greining Glitnis því að stýrivextir Seðlabankans verði óbreyttir, 13,3%, fram á 1. ársfjórðung næsta árs en áður var reiknað með því að bankinn myndi byrja að lækka vexti í nóvember á þessu ári.

„Við reiknum með því að 0,3% vaxtalækkun verði tilkynnt í mars samhliða útgáfu nýrrar þjóðhags- og verðbólguspár Seðlabankans. Við reiknum áfram með nokkuð örum vaxtalækkunum á næsta ári og að stýrivextir verði komnir í 8,6% í lok þess árs. Áður höfðum við gert ráð fyrir að vaxtalækkunarferlið hæfist með 0,5 prósentustiga lækkun í nóvember á þessu ári og að stýrivextir yrðu 7,7% í árslok 2008," samkvæmt Morgunkorni Glitnis.

„Niðurskurður þorskkvótans var öllu meiri en við gerðum ráð fyrir eða 130 þús. tonn í stað 160 þús. tonna. Einnig var tónninn í Seðlabankanum öllu harðari en við reiknuðum með," samkvæmt nýrri stýrivaxtaspá Greiningar Glitnis.

Vaxtaspá Greiningar Glitnis

• 2 blogg um fréttina

Bloggað um fréttina

• Úlfar Þór Birgisson Aspar: Við reiknum með?
• Þorsteinn Gunnarsson: Spáín gekk bara ekki upp hjá ykkur...