Verð á hráolíu hefur hækkað umtalsvert í dag og fór í fyrsta skipti yfir 120 Bandaríkjadali tunnan. Verð á hráolíu til afhendingar í júní fór í 120,21 dal tunnan í viðskiptum á markaði í New York.
Skýrist hækkunin einkum af því að olíubirgðir virðast minni heldur en áður var talið og lækkun á gengi Bandaríkjadals.
Jafnframt hafði áhrif til hækkunar sá óstöðugleiki sem ríkir í norðurhluta Íraks en þar hafa uppreisnarmenn úr hópi Kúrda átt í skærum við tyrkneska herinn.
Um helgina sprengdu uppreisnarmenn í Nígeríu upp stöð í eigu Shell og fleiri aðila sem dregur verulega úr framleiðslugetu í landinu.