Verðbólga mælist 12,7%

Vísitala neysluverðs hækkaði um 0,89% frá fyrra mánuði. Síðastliðna tólf mánuði  hefur vísitala neysluverðs hækkað um 12,7% en vísitala neysluverðs án húsnæðis um 12,1%. Undanfarna þrjá mánuði hefur vísitala neysluverðs hækkað um 5,8% sem jafngildir 25,1% verðbólgu á ári. En verðbólga án húsnæðisliðar mælist 29,4%.

Verðbólga mæld á tólf mánaða tímabili hefur ekki verið jafn mikil síðan í ágúst 1990 er hún mældist 14,2%.

Vísitala neysluverðs án húsnæðis er 275,9 stig og hækkaði um 0,84% frá maí, að því er segir í frétt Hagstofu Íslands.

Eldsneyti hækkaði um 7,2%

Verð á bensíni og olíum hækkaði um 7,2% (vísitöluáhrif 0,35%). Kostnaður vegna eigin húsnæðis hækkaði um 0,4% (0,06%). Þar af voru áhrif af lækkun markaðsverðs -0,04% en áhrif af hækkun raunvaxta voru 0,10%. Greidd húsaleiga hækkaði um 4,3% (0,10%). Þá hækkaði kostnaður vegna viðhalds og viðgerða á húsnæði um 2,0% (0,10%).

Á svipuðu róli og spár greiningardeilda

Greiningardeildir viðskiptabankanna þriggja spáðu 06-1,2% hækkun vísitölu neysluverðs nú í júní. Greining Glitnis spáði 0,6% hækkun. Greiningardeild Kaupþings spáði 1,1% hækkun og greiningardeild Landsbankans 1,2% hækkun.

• 6 blogg um fréttina

Bloggað um fréttina

• Gunnar Freyr Rúnarsson: Hvað viltu að bolurinn þinn segi?
• Jón Magnússon: Kemur verðbólgan engum á óvart?
• Hallur Magnússon: Bankarnir eru að fella gengi krónunar - en bara óviljandi!
• Björgvin Guðmundsson: Enn eykst verðbólgan
• Jóhannes Ragnarsson: Samfylkingin láti til skarar skríða á áhrifaríkan hátt
• Sigurjón Þórðarson: 25% verðbólga - fjöldauppsagnir og Samfylkingin í Sýrlandi