Viðskipti | mbl | 20.11.2008 | 18:01

365 verður Íslensk afþreying

Frá hluthafafundi 365 í dag. Frá vinstri eru Lára N. Eggertsdóttir, Einar Þór Sverrisson, Ari Edwald og Björn Sigurðsson. mbl.is/Ómar

Á hluthafafundi 365 hf. sem haldinn var í dag var samþykkt samhljóða að breyta nafni félagsins í Íslensk afþreying hf. Íslensk afþreying er hlutafélag tveggja eininga, Senu ehf. og EFG ehf. og starfar félagið einkum á vettvangi afþreyingar og skyldrar starfsemi. Gert er ráð fyrir að velta félaganna á þessu ári sé samtals um sex milljarðar króna.

Einnig var á fundinum samþykkt samhljóða að veita stjórn heimild til hækkunar á hlutafé að andvirði þriggja milljarða króna að nafnvirði með útgáfu nýrra hluta.

Á fundinum var einnig samþykkt samhljóða að fækka stjórnarmönnum félagsins úr fimm aðalmönnum í þrjá. Á fundinum voru sjálfkjörin í stjórn Ari Edwald, sem mun gegna stjórnarformennsku, Einar Þór Sverrisson og Lára N. Eggertsdóttir og Hildur Sverrisdóttir sem varamaður.
Björn Sigurðsson verður forstjóri Íslenskrar afþreyingar hf.