Vextir lækkaðir í 12%

Arnór Sighvatsson, aðstoðarbankastjóri Seðlabankans, og Svein Harald Øygard, seðlabankastjóri, sitja ...
Arnór Sighvatsson, aðstoðarbankastjóri Seðlabankans, og Svein Harald Øygard, seðlabankastjóri, sitja báðir í peningastefnunefnd. mbl.is/Golli

Peningastefnunefnd Seðlabankans hefur ákveðið að lækka stýrivexti bankans um 1 prósentu, úr 13% í 12%, samkvæmt tilkynningu á vef bankans.

Vextir daglána lækka einnig um 1 prósentu en aðrir vextir Seðlabankans eru óbreyttir. Gerð verður nánari grein fyrir ákvörðun nefndarinnar á blaðamannafundi klukkan 11. 

Síðast breytti peningastefnunefnd Seðlabankans vöxtum fyrir tæpum mánuði en þeir voru þá lækkaðir um 2,5 prósentur, úr 15,5% í 13%.

Forsvarsmenn bæði Alþýðusambands Íslands og Samtaka atvinnulífsins hafa síðustu daga sagt, að veruleg vaxtalækkun væri forsenda þess að hægt yrði að ná samkomulagi um stöðugleikasáttmála.

Ákvörðun peningastefnunefndar bankans í dag um stýrivexti mun væntanlega hafa mikið að segja um framhald viðræðna aðila vinnumarkaðarins.

Fulltrúar Alþjóðagjaldeyrissjóðsins sögðu hins vegar á fréttamannafundi nýlega að þeir teldu að horfa þyrfti vandlega á stöðu krónunnar og horfur í efnahagsmálum áður en tekin yrði ákvörðun um stýrivaxtalækkun. Varhugavert geti verið að lækka vextina við núverandi aðstæður, en ákvörðunin væri þó í höndum Seðlabankans.

Á síðasta vaxtaákvörðunardegi peningastefnunefndar, þann 7. maí síðastliðinn, sagði Svein Harald Øygard seðlabankastjóri, að stýrivextir myndu lækka umtalsvert í byrjun júní, ef ákveðnar forsendur verði fyrir hendi. Forsendurnar væru meðal annars þær að gengi krónunnar sé stöðugt, mikið aðhald sé í ríkisrekstrinum og að samningar um Icesave-skuldbindingar Landsbankans lægju fyrir. Þetta hefur ekki að öllu leyti gengið eftir.

mbl.is

Bloggað um fréttina

Svæði

Gagnaveitur

Erlendar viðskiptafréttir