Peningastefnunefnd Seðlabanka Íslands hefur ákveðið að lækka vexti bankans um 0,5 prósentur. Vextir á viðskiptareikningum innlánsstofnana lækka í 7% og hámarksvextir á 28 daga innstæðubréfum í 8,25%. Vextir á lánum gegn veði til sjö daga (svonefndir stýrivextir) lækka í 8,5% og daglánavextir í 10%.
Klukkan 11 verður farið yfir vaxtaákvörðun peningastefnunefndar auk þess sem annað hefti Peningamála á árinu verður birt.
Á síðasta vaxtaákvörðunardegi, þann 17. mars, lækkuðu stýrivextir einnig um 0,5% en stýrivextir hafa farið jafnt og þétt lækkandi undanfarið.
Er þetta minni vaxtalækkun nú heldur en Greining Íslandsbanka hafði spáð en deildin spáði því að vaxtalækkunin yrði 0,75 prósentur.