Þýska undrið gæti orðið reiðarslag fyrir illa stödd evruríki

Þjóðverjar hafa fyllstu ástæðu til þess að kætast yfir efnahagsástandinu ...
Þjóðverjar hafa fyllstu ástæðu til þess að kætast yfir efnahagsástandinu um þessar mundir. REUTER

Efnahagsuppgangurinn í Þýskalandi um þessar mundir gæti orðið til þess að Evrópski seðlabankinn hækki stýrivexti fyrr frekar en síðar. Slík vaxtahækkun væri reiðarslag fyrir skuldsett evruríki sem glíma nú við mikinn efnahagsvanda.

 Í nýrri skýrslu matsfyrirtækisins Standard & Poor's er leitt að því líkum að efnahagsuppgangurinn í Þýskalandi myndi þrýsting á stýrivaxtahækkun Evrópska seðlabankans í fyrirsjáanlegri framtíð. Eins og fram kemur í umfjöllun breska blaðsins The Daily Telegraph þá telur matsfyrirtækið yfirgnæfandi líkur á því að seðlabankinn myndi láta undan slíkum þrýstingi og hækka vexti þrátt fyrir að fjölmörg aðildarríki evrusvæðisins glími við djúpstæðan samdrátt og skuldakreppu. S&P spáir því að væntingar um hærri stýrivexti gætu leitt til frekari styrkingar evrunnar á gjaldeyrismörkuðum á næstu 12 mánuðum.

Uppgangurinn í Þýskalandi er fyrst og fremst tilkominn vegna mikillar eftirspurnar nýmarkaðsríkja eftir þýskum iðnaðarvörum og bifreiðum að undanförnu. Þjóðverjar hafa notið sérstaklega góðs af viðvarandi hagvexti í Kína en hlutdeild þýskra fyrirtækja í heildarútflutningi aðildarríkja Evrópusambandsins til Alþýðulýðveldisins nemur 47%.

Við þetta bætist að eftirspurn eftir þýskum útflutningi er ekki sérstaklega háð verðlagningu og því hefur styrking evrunnar á gjaldeyrismörkuðum undanfarin misseri ekki haft mikil áhrif. Fjárfesting í þýska hagkerfinu hefur aukist samhliða vaxandi eftirspurn á alþjóðamörkuðum og vísbendingar eru um að einkaneysla sé tekin að aukast á ný eftir að hafa verið í lítil í fjöldamörg ár. Atvinnuleysi hefur ekki verið minna í Þýskalandi frá því snemma á tíunda áratug síðustu aldar.

Á sama tíma og þessi uppgangur á sér stað í Þýskalandi eru stýrivextir á evrusvæðinu nálægt núlli enda er efnahagsástandið í fjölmörgum aðildarríkjum myntsvæðisins erfitt um þessar mundir. Eins og bent er á í umfjöllun The Telegraph þá minnir ástandið nú um margt hvernig það var við upphaf aldarinnar nema hvað að hlutverkin eru breytt. Þá hélt Evrópski seðlabankinn stýrivöxtum lágum vegna lítils hagvaxtar í Þýskalandi en það fram liðu stundir leiddi lágir vextir til ofhitnunar í hagkerfum ríkja á borð við Spán, Írland og Grikkland.

 

mbl.is

Bloggað um fréttina

Svæði

Gagnaveitur

Erlendar viðskiptafréttir