Vill rannsókn á málefnum sparisjóðanna

Mál Sparisjóðsins í Keflavík kallar á skoðun á því hvernig staðið hefur verið að endurreisn sparisjóðakerfisins, að mati tveggja þingmanna.

Í umfjöllun um mál þetta í Morgunblaðinu í dag segist Guðlaugur Þór Þórðarson, þingmaður Sjálfstæðisflokksins, hafa reynt að fá upplýsingar um kostnað ríkisins vegna sparisjóðanna. Tvær fyrirspurnir liggi fyrir á þinginu en þeim hafi ekki verið svarað.

„Spurningum mínum hefur til þessa verið svarað með skætingi og fjármálaráðherra hefur skýlt sér á bak við upplýsingafulltrúa ráðuneytisins. Frá því að þessi stjórn tók við völdum þá hefur það verið ljóst að taka þurfti á málefnum sparisjóðanna og ríkisstjórnin ber ábyrgð á því að þessi staða er komin upp núna. Vinnubrögðin í kringum þessa tvo sparisjóði og fleiri kallar á að þessi mál verði rannsökuð.“