Alþjóðlega matsfyrirtækið Standard & Poor's hefur varað stjórnvöld í sex evruríkjum, sem eru nú með hæstu lánshæfiseinkunn, við því að til þess kunni að koma að einkunnirnar verði lækkaðar.
Blaðið Financial Times segir að síðar í kvöld muni S&P tilkynna að lánshæfiseinkunnir Þýskalands, Frakklands, Hollands, Austurríkis, Finnlands og Lúxemborgar verða settar á athugunarlista vegna hugsanlegrar lækkunar.
Að sögn blaðsins varaði S&P ríkin sex við því, að einkunnir þeirra kunni að verða lækkaðar úr AAA í AA+. Sérfræðingar segja að það ætti ekki að koma á óvart ef einkunn Frakka lækkar en fáir hafa spáð því að einkunn Þýskalands sé í hættu.
Matsfyrirtækið segist m.a. hafa áhyggjur af hugsanlegum áhrifum, sem vaxandi pólitísk og efnahagsleg vandamál á evrusvæðinu hafi á efnahagslíf Þýskalands. Þess vegna sé lánshæfismat þýska ríkisins tekið til skoðunar.