„Víkingarnir“ aftur á kreik með aðstoð Walkers

Dálkahöfundur sunnudagsblaðsins Observer skrifar um opnun verslunarinnar Iceland á Íslandi. Hann segir Malcolm Walker, eiganda Iceland, ekki hafa gleymt sínum gömlu viðskiptafélögum.

Simon Goodley rekur tengsl feðganna Jóhannesar Jónssonar og Jóns Ásgeirs Jónssonar við matvörukeðjuna Iceland í grein sinni og segir íslenska viðskiptavíkinginn Jón Ásgeir nú aftur leita í ræturnar með hjálp stofnanda Iceland, Malcolms Walkers.

Walker, sem endurheimti Iceland fyrr á árinu, hafi ekki gleymt sínum gömlu félögum, og að Jóhannes Jónsson hafi stoltur opnað fyrstu Iceland-verslunina á Íslandi um helgina.

Goodley fer yfir viðskiptasögu feðganna, hvernig þeir stofnuðu lágvöruverðsverslunina Bónus á níunda áratugnum og hófu svo að byggja upp viðskiptaveldi sitt, undir nafni Baugs. Jón Ásgeir hafi svo leitað samstarfsaðila til að kaupa Iceland-keðjuna og að Walker, sem á þeim tíma var ekki lengur eigandi hennar, hafi verið augljós kostur.

Þá skrifar Goodley að bankahrunið hafi þurrkað viðskiptaveldið Baug út og að Walker hafi í kjölfarið náð yfirráðum í Iceland.

Nú hafi greiðinn verið launaður og „án efa nýtur Jóhannes Jónsson þess að vera kominn í beina samkeppni við sína gömlu verslun, Bónus,“ skrifar Goodley.

• 3 blogg um fréttina

Bloggað um fréttina

• Þórdís Bachmann: Að kyssa vöndinn
• Heimir Lárusson Fjeldsted: Höfum ekki mörg orð um viðskitptasiðleysingja
• Pálmi Hamilton Lord: Áfram jòi.