Motorola í kínverska eigu

Google hefur selt kínverska tölvuframleiðandanum Lenovo bandaríska farsímafyrirtækið Motorola Mobility á 2,91 milljarð Bandaríkjadala, sem svarar til 335 milljarða króna. Salan kemur mjög á óvart enda innan við tvö ár síðan Google keypti Motorola á 12,5 milljarða dala, 1.441 milljarð króna.

Samkvæmt fréttum AFP og BBC stefnir Lenovo að byggja upp snjallsímadeild sína í gegnum Motorola og vonast fyrirtækið að með því verði hægt að vinna upp þann samdrátt sem hefur orðið í sölu á einkatölvum.

Hins vegar mun Google halda eftir ýmsum ábatasömum sérleyfum Motorola, svo sem Android stýrikerfinu.

Í tilkynningu frá Google kemur fram að miklar hræringar séu á snjallsímamarkaði og að snjallsímaframleiðsla Motorola eigi mun betur heima hjá Lenovo. Með viðskiptunum verðir Lenovo þriðji stærsti farsímaframleiðandi heims á eftir Samsung og Apple.

Markaðsrannsóknarfyrirtækið Strategy Analytics segir að Lenovo hafi gert góðan samning með kaupunum og þetta eigi eftir að vera fyrirtækinu til hagsbóta.