Hæsta fermetraverðið í miðborginni

Árið 2013 var hæsta fermetraverðið á höfuðborgarsvæðinu 336 þúsund krónur í miðborg Reykjavíkur og það lægsta 193 þúsund krónur á Vöngum í Hafnarfirði. 75% munur er þarna á milli og hefur aldrei verið meiri, að því er segir í umfjöllun hagfræðideildar Landsbankans.

Dýrustu hverfin, á eftir miðborginni í Reykjavík, eru miðlæg svæði í Reykjavík, Garðabær og Seltjarnarnes. Garðabæ er skipt upp í þrjá hluta og eru þau öll meðal sex dýrustu hverfanna. Miðlægu hverfin í Reykjavík, eins og Melar, Hagar, Lönd, Grandar og Hlíðar koma einnig sterk inn.

Hagfræðideildin segir að á þensluárunum fyrir hrun hafi verðmunur milli dýrustu og ódýrustu hverfa aukist mikið. Sá munur hafi síðan minnkað aftur við hrunið og á árunum þar á eftir. Á síðustu tveimur árum hafi þessi munur svo aukist aftur en hann er nú meiri en nokkru sinni fyrr.

Sé litið á þróun hæstu og lægstu verða yfir lengri tíma má sjá að munurinn hefur aukist nær stöðugt. Á árinu 2002 var dýrasta hverfi 30% dýrara en ódýrasta hverfið, en munurinn er nú næstum því 75%.

„Mikil umræða hefur verið á síðustu misserum um mikla spurn eftir íbúðum á miðlægum svæðum sem hafi ýtt verðum þar upp á við. Þessar tölur staðfesta þá kenningu að einhverju leyti, en þó ekki öllu þar sem hækkun á miðsvæðum í Reykjavík, til dæmis miðborginni, var ekki meiri en víða annars staðar,“ segir hagfræðideildin.

• Blogga um frétt